Gŵyl Gerdd Ryngwladol Gogledd Cymru
10 - 19 Medi 2026
Croeso’r Cyfarwyddwr Artistig
Croeso i Ŵyl Gerdd Ryngwladol Gogledd Cymru 2026. Eleni, rydym yn ymgynnull o dan y thema Macrocosm: Cerddoriaeth a Chadwraeth, gan archwilio cydgysylltiad dwfn ein byd naturiol a’r rôl y gall cerddoriaeth ei chwarae wrth ddyfnhau ein dealltwriaeth ohono. Wedi’i ysbrydoli gan y syniad bod popeth yn gysylltiedig—o’r organeb fyw leiaf i’r systemau helaeth sy’n cynnal ein planed—mae ein rhaglen yn gwahodd cynulleidfaoedd i fyfyrio ar le dynoliaeth o fewn natur a’r cyfrifoldeb a rannwn am ei dyfodol.
Rydym wrth ein bodd yn agor gŵyl eleni gydag un o artistiaid enwocaf Cymru, Syr Bryn Terfel, ynghyd â’r pianydd Ellis Thomas, mewn noson o gerddoriaeth a sgwrs yn myfyrio ar yrfa ryngwladol nodedig. Drwy gydol yr ŵyl, bydd cynulleidfaoedd yn dod ar draws artistiaid y mae eu gwaith yn ymateb i dirweddau, diwylliannau a chymunedau o bob cwr o’r byd. Mae’r feiolinydd o Ganada Jack Campbell a’r cyfansoddwr-pianydd o Gymro Pwyll ap Siôn, yn perfformio fel Duologue, yn cyflwyno rhaglen sy’n cwmpasu Bach, Philip Glass ac Arvo Pärt, ochr yn ochr â gweithiau newydd wedi’u hysbrydoli gan adar mewn perygl ac alawon gwerin traddodiadol. Mae’r ensemble lleisiol rhyngwladol enwog The Gesualdo Six yn dod â’i gymysgedd enwog o repertoire y Dadeni a chyfoes, tra bod ein opera a gomisiynwyd ar y cyd â JAM on the Marsh, The Lost Boy, gan Jago Thornton ac Anastasia Bruce-Jones, yn archwilio hunaniaeth, galar, newid amgylcheddol a pherthyn o fewn cymuned bysgota Gymreig ffuglennol.
Mae’r ŵyl yn parhau gyda dathliad o gerddorion dawnus lleol wrth i Gerdd Cydweithredol Sir Ddinbychailymweld â’i cyfraniad hanesyddol ynn ngwasanaeth Dydd Iau Cablyd Brenhinol gyda perfformiadau gan ei ensembles a cherddorion ifanc. Bydd cynulleidfaoedd hefyd yn mwynhau synau atmosfferig y cyfansoddwr caneuon a’r aml-offerynnwr o Gymru, Tom Mason, yn perfformio fel Denuo.
Mae cefnogi’r genhedlaeth nesaf o dalent gerddorol yn parhau i fod yn ganolog i’n cenhadaeth, ac ‘rydym yn falch o gynnal Rownd Derfynol Cerddor Ifanc Cymru Pendine, a recordir ar gyfer BBC Radio Cymru, gyda’r beirniaid nodedig yr Athro Helena Gaunt, Iwan Llewelyn-Jones ac Alun Jones, ochr yn ochr â pherfformiad arbennig gan y pianydd Rufus Edwards. Gwahoddir cynulleidfaoedd ifanc a theuluoedd i brofi Pedr a’r Blaidd gyda NEW Sinfonia, dan arweiniad Robert Guy a’i hadrodd gan Zeb Soanes gyda Dehongliad Iaith Arwyddion Prydain, mewn cyngerdd sy’n dathlu rhyfeddodau’r byd naturiol wrth gyflwyno tair comisiwn newydd wedi’u hysbrydoli gan y Wiwer Goch, y Bele a Chwilen Dail yr Wyddfa sydd mewn perygl, ganMichael Cheng, Anthony White a Gemma McGregor.
Mae ymrwymiad yr ŵyl i gyfnewid diwylliannol yn cael ei adlewyrchu yn ymddangosiad Panedeni, y mae ei gyfuniad unigryw o draddodiadau cerddorol Cymreig ac Arabaidd yn dangos pŵer cerddoriaeth i groesi ffiniau a chysylltu cymunedau. Mae ein harchwiliad o gadwraeth yn parhau y tu hwnt i lwyfan y cyngerdd trwy sgyrsiau a myfyrdodau, gan gynnwys trafodaeth ddarluniadol Mario Kreft MBE ar gadwraeth gorillas yn Rwanda a Kenya, a phrynhawn gyda’r bardd a’r dramodydd nodedig Athro Menna Elfyn, un sydd wedi cyfoethogi bywyd diwylliannol Cymru ers degawdau.
Un o uchafbwyntiau’r ŵyl fydd dychweliad Cerddorfa Genedlaethol Gymreig y BBC, dan arweiniad Tianyi Lu, gyda’r delynores Alis Huws a’r feiolinydd Thomas Mathias. Mae eu rhaglen yn teithio trwy The Lark Ascending gan Vaughan Williams, première byd-eang concerto telyn dramatig newydd gan Cameron Biles-Liddell, Nature’s Dance, a gomisiynwyd gan yr ŵyl mewn cydweithrediad â’r BBC, a Symffoni Bugeiliol Beethoven—myfyrdod cerddorol nodedig ar harddwch a phŵer natur. Mae awyrgylch yr ŵyl yn parhau i’r nosweithiau drwy ein Arddangosfa i Gyfansoddwyr Caneuon gyda’r Llwyfan Goleuedig, cyfleoedd i greu cerddoriaeth yn y gymuned, ac amrywiaeth o ddigwyddiadau ymylol sy’n dod â pherfformwyr a chynulleidfaoedd ynghyd i ddathlu.
Mae ein penwythnos clo yn adlewyrchu cred yr ŵyl bod cerddoriaeth yn perthyn i bawb. Bydd cerddorion ifanc yn cymryd rhan yn Camau Cerdd, tra bod ein cyngerdd olaf yn gweld y corau clodwiw Encôr a Hen Nodiantyn uno am y tro cyntaf, gan berfformio cerddoriaeth yn amrywio o gân werin Gymreig i The Peacemakers gan Karl Jenkins a Requiem gan Fauré. Mae’r ŵyl yn gorffen gyda Noson Gomedi Gogledd Cymru, gan ddod â’n dathliad deg diwrnod i ben yn orfoleddus.
Ochr yn ochr â’r perfformiadau hyn, ‘rydym yn falch o gefnogi rhaglen uchelgeisiol o brosiectau cymunedol, gan gynnwys ein Cyngerdd Plant Bach a Phlant a’n Cyngerdd Dementia Gyfeillgar sydd bob amser yn boblogaidd, cydweithrediadau celfyddyd weledol a cherddoriaeth dan arweiniad Sioned Webb, Ben Davis a Jude Wood, a gwaith allgymorth gydag ysgolion arbenigol, lleoliadau gofal, ysbytai a grwpiau cymunedol gyda Live Music Now Cymru ledled Gogledd Cymru.
Diolch yn fawr iawn i’n holl gyllidwyr grantiau, noddwyr a chefnogwyr hael sy’n rhoi cymaint. Mario a Gill Kreft ac Ymddiriedolaeth Celfyddydau a Chymuned Pendine, Cyngor Celfyddydau Cymru, Ymddiriedolaeth Elusennol Colwinston, Ymddiriedolaeth Celfyddydau Scops, Tŷ Cerdd, Cyngor Dinas Llanelwy, Cyfrifwyr Siartredig Salisburys, holl ffrindiau yr ŵyl a rhoddwyr preifat.
Wrth i ni ddathlu gallu cerddoriaeth i ysbrydoli rhyfeddod, meithrin dealltwriaeth a chryfhau cymunedau, ‘rydym yn eich gwahodd i ymuno â ni i fyfyrio ar y cysylltiadau cymhleth sy’n ein rhwymo i’n gilydd ac i’r byd a rannwn. Gobeithiwn y bydd gŵyl eleni yn cynnig eiliadau o harddwch, darganfyddiad ac ysbrydoliaeth, ac yn ein hatgoffa, trwy greadigrwydd, cydweithio a gofal, y gallwn ni i gyd chwarae rhan wrth gynnal y macrocosm ehangach yr ydym yn rhan ohono.
Croeso i Ŵyl Gerdd Ryngwladol Gogledd Cymru 2026.
Paul Mealor LVO CStJ
Cyfarwyddwr Artistig
Cefnogwch yr Ŵy
Cliciwch yma I Gyrannu
Arolwg Cynulleidfa
Byddem wrth ein bodd yn clywed gennych a dysgu am eich profiadau gyda’r Ŵyl.
Mae ein harolwg byr yn cymryd llai na munud!
